Sri Raghava Stotram – శ్రీ రాఘవ స్తోత్రం
ఇంద్రనీలాచలశ్యామమిందీవరదృగుజ్జ్వలమ్ |
ఇంద్రాదిదైవతైః సేవ్యమీడే రాఘవనందనమ్ || 1 ||
పాలితాఖిలదేవౌఘం పద్మగర్భం సనాతనమ్ |
పీనవక్షఃస్థలం వందే పూర్ణం రాఘవనందనమ్ || 2 ||
దశగ్రీవరిపుం భద్రం దావతుల్యం సురద్విషామ్ |
దండకామునిముఖ్యానాం దత్తాభయముపాస్మహే || 3 ||
కస్తూరీతిలకాభాసం కర్పూరనికరాకృతిమ్ |
కాతరీకృతదైత్యౌఘం కలయే రఘునందనమ్ || 4 ||
ఖరదూషణహంతారం ఖరవీర్యభుజోజ్జ్వలమ్ |
ఖరకోదండహస్తం చ ఖస్వరూపముపాస్మహే || 5 ||
గజవిక్రాంతగమనం గజార్తిహరతేజసమ్ |
గంభీరసత్త్వమైక్ష్వాకం గచ్ఛామి శరణం సదా || 6 ||
ఘనరాజిలసద్దేహం ఘనపీతాంబరోజ్జ్వలమ్ |
ఘూత్కారద్రుతరక్షౌఘం ప్రపద్యే రఘునందనమ్ || 7 ||
చలపీతాంబరాభాసం చలత్కింకిణిభూషితమ్ |
చంద్రబింబముఖం వందే చతురం రఘునందనమ్ || 8 ||
సుస్మితాంచితవక్త్రాబ్జం సునూపురపదద్వయమ్ |
సుదీర్ఘబాహుయుగలం సునాభిం రాఘవం భజే || 9 ||
హసితాంచితనేత్రాబ్జం హతాఖిలసురద్విషమ్ |
హరిం రవికులోద్భూతం హాటకాలంకృతం భజే || 10 ||
రవికోటినిభం శాంతం రాఘవాణామలంకృతిమ్ |
రక్షోగణయుగాంతాగ్నిం రామచంద్రముపాస్మహే || 11 ||
లక్ష్మీసమాశ్రితోరస్కం లావణ్యమధురాకృతిమ్ |
లసదిందీవరశ్యామం లక్ష్మణాగ్రజమాశ్రయే || 12 ||
వాలిప్రమథనాకారం వాలిసూనుసహాయినమ్ |
వరపీతాంబరాభాసం వందే రాఘవభూషణమ్ || 13 ||
శమితాఖిలపాపౌఘం శాంత్యాదిగుణవారిధిమ్ |
శతపత్రదృశం వందే శుభం దశరథాత్మజమ్ || 14 ||
కుందకుడ్మలదంతాభం కుంకుమాంకితవక్షసమ్ |
కుసుంభవస్త్రసంవీతం పుత్రం రాఘవమాశ్రయే || 15 ||
మల్లికామాలతీజాతిమాధవీపుష్పశోభితమ్ |
మహనీయమహం వందే మహతాం కీర్తివర్ధనమ్ || 16 ||
ఇదం యో రాఘవస్తోత్రం నరః పఠతి భక్తిమాన్ |
ముక్తః సంసృతిబంధాద్ధి స యాతి పరమం పదమ్ || 17 ||
ఇతి శ్రీ రాఘవ స్తోత్రమ్ |
